Presentación do libro "La renovación de las peregrinaciones a Santiago de Compostela en el siglo XIX: entre tradición y modernidad", de Antón M. Pazos, editado polo Instituto de Estudios Gallegos "Padre Sarmiento"
Nesta obra estúdase o impacto que tivo a modernidade nas peregrinacións españolas no século XIX e, especialmente, na de Compostela, relacionándoas co movemento de revitalización peregrinante en toda Europa, do Leste e do Oeste.
Participarán no acto: Ramón B. Rodríguez, da Editorial CSIC; José Andrés-Gallego, CSIC, Madrid; Milagrosa Romero Samper, Universidade CEU; e Antón M. Pazos, CSIC, Santiago de Compostela.
O Consello Superior de Investigacións Científicas, a través do Instituto de Estudios Gallegos "Padre Sarmiento" (CSIC, XUGA), presenta este libro, cuxo investigador principal é Antón M. Pazos e que está financiado polo MINECO.
Analiza un aspecto concreto da evolución experimentada polas peregrinacións no século XIX co desenvolvemento de novos medios de transporte: as exploracións para redescubrir o corpo de Santiago e a promoción que, a partir do achado, fíxose en toda Europa para revitalizar a peregrinación e a cidade de Santiago.
A obra consta de sete capítulos cuxos autores son: Enrique Martínez (USC), Fernando Acuña (USC) falecido recentemente e a quen se dedica o libro, Antón M. Pazos (IEGPS), Milagrosa Romero Samper (Universidade San Pablo- CEU), Antón Pombo, José Andres-Gallego (Instituto de Historia do CSIC) e Francisco Javier Ramón Solans (Universidade de Münster).
Antón M. Pazos. Naceu na Coruña. É doutor en Historia e Teoloxía, e imparte clases na Universidade de Navarra. Estudou a vida relixiosa na sociedade española e hispanoamericana dos dous últimos séculos, en especial a relixiosidade popular, utilizando fontes e técnicas ata agora pouco explotadas. Sobre estes temas organizou e publicou varios coloquios internacionais e dirixido un proxecto público de investigación. É correspondente da Academia Colombiana de Historia Eclesiástica e secretario xeral do Padroado Europeo de Historia.
